Dagur Arngrímsson Taflfélagi Bolungarvíkur með stórmeistaraáfanga

 

Dagur Arngrímsson (2392) Taflfélagi Bolungarvíkur gerði jafntefli við kúbverska alþjóðlega meistarann Fidel Corrales Jimenez (2552) í níundu og síðustu umferð alþjóðlegs móts í Harkany í Ungverjalandi.  Með því tryggði Dagur sér sinn fyrsta áfanga að stórmeistaratitli!  

Árangur Dags svarar til 2628 stiga og hækkar hann um 27 stig fyrir frammistöðuna. Jón Viktor Gunnarsson og Bragi Þorfinnsson félagar í Taflfélagi Bolungarvíkur tóku einnig þátt í mótinu ásamt Guðmundi Kjartanssyni úr Taflfélagi Reykjavíkur. Jón Viktor og Bragi stóðu sig þokkalega og Guðmundur Kjartansson náði áfanga að alþjóðlegum meistaratitli.

Þetta er þriðja mótið í þessari ferð sem þeir félagar taka þátt í með styrk frá Taflfélagi Bolungarvíkur. Fyrsta mótið var Evrópumót Taflfélaga í Grikklandi  17.-23.október. Þar náði Guðmundur Gíslason frá Ísafirði áfanga að alþjóðlegum áfanga og sveit Taflfélags Bolungarvíkur í 36.sæti af 64 sveitum. Annað mótið var First Saturday í Búdapest í Ungverjalandi 1.-12.nóvember. Í því móti lenti Jón Viktor í sjötta sæti og hækkaði þó nokkuð að stigum.  Mótið sem var að klárast í gær fór fram dagana 14.-22.nóvember. Þetta er því búin að vera þétt törn hjá félagsmönnum í Taflfélagi Bolungarvíkur og skilað góðum árangri.

Dagur og Jón Viktor halda nú til Belgrad í Serbíu þar sem þeir tefla á alþjóðlegu skákmóti ásamt Guðmundi Kjartanssyni og  Snorra G. Bergssyni úr Taflfélagi Reykjavíkur.   

Milov-Bragi EM2008

GM Vadim Milov 2681 (Alkaloid)
IM Bragi Þorfinsson 2383 (Taflfélagi Bolungarvíkur)
Ensku leikur

1. c4 Rf6 2. Rc3 e5 3. e3 c6 4. Rf3 e4 5. Rd4 d5 6. cxd5 cxd5 7. d3 exd3 8.Bxd3 Rc6

9. O-O Bd6 10. Rxc6 bxc6 11. e4 Rg4
Bragi er hvergi hræddur og leggst í kóngsókn. Áhrifamáttur sóknarinnar virðist þó ekki vera mikill.
12. h3 Dh4 13. exd5 O-O

 

14. Re4
14.dxc6 var áreiðanlega betri. Framhaldið hefði getað orðið 14.-Be5 15.Dc2 Be6 16.Re4 og hvítur er tveim peðum yfir og ekki er að sjá að sókn svarts sé hættuleg.
14. - Bh2+ 15. Kh1 cxd5 16. Rg5 Be5 17. Rf3 (17.Bxh7+ hefði verið í lagi, því eftir 17.-Kh8 18.Bd3 Rxf2+ þá getur hvítur drepið riddarann vegna Dh5+ með máti) Dh5 18. Be2 Rf6 19. Rxe5 Dxe5 20. Be3 Re4 21. Dd4 Dxd4 22. Bxd4

 

Maður skildi halda að stórmeistarinn myndi smám saman ná að svíða þessa stöðu.
22. - a5 23. Kh2 Ba6 24. Bxa6 Rxa6 25. Rac1 a4 26. Rfd1 h6 27.Rc2 Rd8 28. Be3 Rd7 29. Rd4 Kh7 30. Rb4 Kg6 31. h4 h5

32. f3 Rd6 33. Hd2 Rf5 34. Bf2 Re7 35. Hb5 f6 36. g4 hxg4 37. fxg4 Kf7 38. Kg3 Ke6 39. He2+ Kf7 40.Bc5 Rc6

Bragi hefur teflt vörnina vel og að sama skapi hefur Milov teflt ráðleysislega. Bragi er allt í einu kominn með fína stöðu og staka peðið orðið hættulegt frípeð og riddarinn virkur á miðborðinu.
41. h5 d4 42. g5 Re5 43. Bb4 Hc6 44. Hf2 Rd3 45. Hd2 Re5 46. Kf4 Ke6 47. Ke4 d3

48. b3 axb3 49. axb3 f5+ 50. Ke3
Ef 50.Kf4 þá Hd4+ og svartur fer með hrókinn á kóngsvæng og verður peði yfir plús vinnandi stöðu.
50. - Rg4+ 51. Kf3 Hd4

Hvítur er í stökustu vandræðum og má teljast heppinn að eiga leik sem heldur honum á lífi.
52. Bf8! Hc1
Hérna komu tveir aðrir leikir til greina:
52. - Hc2 53.Bxg7 (53.Hxc2 dxc2 54.Re5+ Ke3 55.Hc4) He4 54.Hxd3 Rh2+ með þráskák
52. - Hc7 54.h6 gxh6 55.gxh6 Re5+ 56.Hxe5+ Kxe5 57.Bxg7+ Hxg7 58.hxg7 með jafntefli
53.Bxg7 Hf1+ 54. Kg3 Hg1+ 55. Kf3 Hf1+ 56. Kg3 Hg1+ með þráskák
1/2 - 1/2

Aloyzas Kveinys - Jón Viktor

Jón Viktor tefldi vel allt mótið, en besta skák hans var trúlega á móti hinum öfluga Kveinys frá Lettlandi.

GM Aloyzas Kveinys 2533 (Vilnius Chess-Bridge Club)

IM Jón Viktor Gunnarsson 2430 (Taflfélag Bolungarvíkur)

Drottningarpeðsbyrjun sem þróast út í Sikileyjarvörn - Maroczy Bind

1.d4 Rf6 2.Rf3 g6 3.c4 c5 4.Rc3

Kveinys vill greinilega ekki hleypa Jóni Viktori í Benkö bragðið.

4. - cxd4 5.Rxd4 Rc6 6.e4 d6 7.Be2 Rxd4 8.Dxd4 Bg7 9.Be3 0-0 10.Dd2

Kveinys hafði teflt þessa stöðu tvisvar áður (Malisauskas 1998 og Tiviakov 2002). Báðar þær skákir enduðu með jafntefli. Jón Viktor velur núna óalgengt framhald sem hann sagðist hafa skoðað á eldhúsborðinu nokkrum mánuðum áður.

10. -  a5!? 11.0-0 a4 12.f3 Da5 13.Hab1

Hugsanlega var betra að staðsetja hrókinn á c1. Þá á svartur t.d. ekki Bxa2 eins og kom upp í skákinni. En hugsanlega hefur Jón Viktor þá ætlað sér að leika 10. - Be6 (10.-Bd7 11.c5!) 11.Rd5 Dxd2 12.Rxe7+ Kh8 13.Bxd2 Hfe8 14.Rd5 Rxd5 15.cxd5 Bxd5 16.Bb5 og þá má leika He5 og svartur virðist mega vel við una.

13. - Be6 14.Rd5 ?!

Trúlega var 14.Hfc1 ráðlegra. Svartur kemur sér samt þægilega fyrir í þeirri stöðu með 14. - Hfc8 og þrýstir á c4 peðið.

14. - Dxd2 15.Rxe7+ Kh8 16.Bxd2 Hfe8 17.Rd5 Rxd5 18.cxd5 Bxd5

Þessi peðsvinningur til baka er þekktur í áþekkum stöðum. Núna er einungis spurning um hvernig spilast úr þessari stöðu.

19.Bb5

Hugsanlega var 19.a3 Ba2 20.Ha1 Bb3 21.Hab1 betra, en hvítur verður samt í eilífðar vandamálum með veik peðin á a3 og b2.

19. -  Bxa2 20.Bxe8  (20.Ha1 He5) Bxb1 21.Bxf7 Bd3 22.Hd1

Sennilega hefur Kveinys verið að leita eftir einhverri leikjaröð sem notfærir sér mát með tveim biskup ef svartreita biskup svarts hverfur af skálínunni h8-a1, eins og 22. - Bxb2 23.Bb4 Bb5 24.Hd2 Be5 25.Hxd6 a3 26.Bxa3 Hxa3 27.Hd5 með jafnri stöðu.

22. - Bd4+ 23.Kh1 Bc2 24.Ha1 Kg7! (24. - Bxb2? 25.Ha2 a3 26.Hxb2! og vinnur) 25.Bd5 Bxb2 26.He1 a3 27.Ba2 b5 og hvítur gafst upp.

Ekkert er hægt að gera við áætluninni Ha4,b4,b3 og svartur vinnur. Mjög stílhrein og vel tefld skák hjá Jóni Viktori.

Hugleiðing um félagið og liðin okkar

Á undanförnu ári hefur Taflfélag Bolungarvíkur verið í mikilli sókn og er núna að verða öflugasta og mest spennandi taflfélag landsins. Eins og í vel tefldri skák þá hugsar félagið nokkuð marga leiki fram í tímann og bætir stöðu félagsins jafnt og þétt með markvissum aðgerðum.
Sóknin byrjaði með því að styrkja lítillega lið félagsins í Íslandsmóti skákfélaga fyrir síðasta keppnistímabil. Það skilaði a-liðinu sigri í 2. deild og b-liðið sigraði 4.deild. Fjölmennt Hraðskákmót Íslands var haldið í Bolungarvík í fyrrahaust fyrir tilstuðlan Sparisjóðs Bolungarvíkur og Kaupþings. Áfram var sótt og unglingastarf í Bolungarvík endurvakið með því að fá Rúnar Arnarsson og Björgvin Bjarnason til að hafa umsjón með skákæfingum. Í vor tók Taflfélagið svo að sér það stórvirki að halda Landsmótið í skólaskák í Bolungarvík. Alls kepptu 24 keppendur í tveimur aldursflokkum. Fjórir keppendur voru frá Vestfjörðum, Ingólfur Daði Guðvarðarson og Daði Arnarsson frá Bolungarvík í yngri flokki og Arnór Gabríel Elíasson frá Ísafirði og Páll Sólmundur Eydal frá Bolungarvík í eldri flokki.
Fyrir skáktímabilið veturinn 2008-2009 voru sett eftirfarandi markmið:
    * Að vinna 1.deild, það man enginn eftir því að hafa lent í öðru sæti
    * Að vinna 3.deild
    * Að koma með tvær nýjar sveitir í 4.deild. Önnur yrði blanda af reynslumiklum skákmönnum og ungum og efnilegum krökkum frá Bolungarvík. Hin yrði í toppbaráttu 4.deildar.
    * Að efla enn frekar barna- og unglingastarf í Bolungarvík
    * Að fá enn fleiri gamalreynda bolvíska skákmenn aftur að skákborðinu
    * Að styrkja efnilega íslenska skákmenn til afreka
Strax síðastliðið vor hófst undirbúningurinn og þá sérstaklega að gera ráðstafanir til þess að fyrsta markmiðið gæti náðst. Við viðurkennum það fúslega, og skömmumst okkur ekkert fyrir, að við notum að hluta til málaliða í a-liðinu sem teflir í 1.deild. Til þess að blanda sér í toppbaráttuna í þeirri deild er nauðsynlegt að kaupa erlenda stórmeistara til hjálpar, það er bara bláköld staðreynd. Auk þess verða íslensku liðsmennirnir að vera verulega sterkir.  Þar sem aðeins er leyfilegt að vera með fjóra útlendinga af átta keppendum þá sáum við strax að fyrsta verkefnið yrði að fá fjóra sterka íslenska skákmenn til liðs við okkur. Þar sem sterkir íslenskir skákmenn eru takmörkuð auðlind, þá var það ekki auðvelt verkefni. Þó náðum við að gera samning við fjóra frábæra skákmenn og í rauninni þótti það svo eftirsóknavert að ganga til liðs við okkur að færri komust að en vildu. Fyrstan er að telja stórmeistarann, Bolungarvíkur-vininn og uppáhald margra bolvískra skákmanna, Jón L Árnason. Svo voru gerðir tímamótasamningar við þá Jón Viktor Gunnarsson, Braga Þorfinnsson og Dag Arngrímsson. Taflfélag Bolungarvíkur styrkir þá verulega til skákiðkunar næstu árin og í staðinn munu þeir tefla fyrir okkur næstu tíu árin (Dagur næstu þrjú). Bæði Jón Viktor og Bragi stóðu á tímamótum og voru við það að hætta að stefna á að verða stórmeistarar. Með samningnum við Taflfélag Bolungarvíkur munu þeir geta einbeitt sér að skákiðkun næstu tvö árin og gera atlögu að stórmeistaratitlinum. Segja má að við höfum tekið þá í fóstur á ögurstundu og gert þá að bolvískum skákmönnum. Við eigum því eftir að heyra nöfn þeirra tengd bolvísku skáklífi næstu tíu árin að minnsta kosti.
Í þriðju og fjórðu deild höfum við einnig styrkt okkur og liðsmönnum fjölgað, því til liðs við okkur hafa gengið skákmenn sem eru tengdir Bolungarvík eða bolvískum skákmönnum. Einnig höfum við fengið aftur að skákborðinu gamlar kempur sem hafa sýnt að þeir hafa engu gleymt og hafa komið á óvart með góðum árangri.
Alls tóku 31 félagsmenn í Taflfélagi Bolungarvíkur þátt í fyrri hluta Íslandsmótsins. Þeir skiptust þannig: einn Hollendingur, einn Grikki, tveir Úkraínumenn, sjö Reykvíkingar, einn Akureyringur, einn Sunnlendingur, tveir Ísfirðingar, einn Suðureyringur, tveir frá Búðardal og þrettán Bolvíkingar.
Auk Íslandsmóts skákfélaga þá eru fjölmörg önnur verkefni sem hafa farið fram eða eru framundan. Þar má nefna Hraðskákhátíðina sem haldin var um miðjan september í Bolungarvík og Evrópukeppni skákliða sem fer fram í Grikklandi um miðjan október.
En verður þetta með Taflfélag Bolungarvíkur eins og svo margar "málaliða-sveitir" að þetta verður blaðra sem springur, allt fer á hausinn og sveitirnar falla niður um deildir eins og sökkvandi skip ?
Nei. Við vitum alveg hvað við erum að gera og við teljum aðferð okkar þá einu réttu. Við vildum koma bratt inn í íslenskt skáklíf og stimpla okkur rækilega inn. Á einu ári hefur okkur tekist að verða eitt sterkasta taflfélagið á Íslandi og það sem er mest spennandi.  Nær allar okkar áætlanir hafa gengið eftir og við erum með blússandi byr í seglunum.
Á næsta ári munum við slaka á í Íslandsmóti skákfélaga og þá munum við byggja a-sveitina á íslenska kjarnanum í sveitinni ásamt vestfirskum skákmönnum sem tefla í b-sveitinni. Sú sveit mun ekki verða jafn gríðarlega sterk og núverandi a-sveit, en mjög frambærileg í 1.deild.  Fókusinn verður settur á unglingastarfið í Bolungarvík og starf á meðal bolvískra skákmanna á höfuðborgarsvæðinu. Meira að segja eru hugmyndir um unglingastarf á meðal Bolvíkinga á höfuðborgarsvæðinu. Við erum því að byggja til framtíðar. Byrjum bratt og notum svo brekkuna sem við erum búnir að koma okkur fyrir í til að komast sem lengst. Nú þegar finnum við fyrir miklum áhuga bæði á meðal okkar sjálfra sem höfum staðið í eldlínunni undanfarin ár, hjá krökkum í Bolungarvík og nágranna sveitafélögum, hjá gömlum bolvískum skákkempum, hjá Bolvíkingum og hjá íslensku skákhreyfingunni.
Það er því mjög bjart framundan hjá Taflfélagi Bolungarvíkur

 

Jón Viktor Gunnarsson Taflfélagi Bolungarvíkur Hraðskákmeistari Íslands 2008

 

Arnar Gunnarssson að gefast upp í seinni úrslitaskákinni við Jón Viktor Gunnarsson og sá síðarnefndi þar með orðinn Hraðskákmeistari Íslands 2008

 

Frá skak.is

Jón Viktor Gunnarsson varð í dag Íslandsmeistari í hraðskák eftir æsispennandi mót sem fram fór í dag í blíðskaparveðri í Bolungarvík.  Jón Viktor og Arnar E. Gunnarsson komu jafnir í mark með 13 vinninga en Jón vann einvígi þeirra á millum 2-0.   Henrik Danielsen og Björn Þorfinnsson urðu í 3.-4. sæti með 12,5 vinning.

Jón Viktor byrjað ekki vel og tapaði í 4. og 5. umferð.  Eftir það héldu honum engin bönd og vann hann 12 næstu skákir séu einvígisskákirnar taldar með.  Lengi vel leit út fyrir sigur Jóns L. Árnasonar en tvö töp í lokin komu í veg fyrir hann.

Aðrir verðlaunahafar urðu:

• Undir 2100: Stefán Freyr Guðmundsson
• Undir 1800: Nökkvi Sverrisson
• Stigalausir: Sigurður Hafberg
• 50 ára og eldri: Magnús K. Sigurjónsson
• 16 ára og yngri:  Svanberg Már Pálsson, Jakob Szudrawski og Páll Sólmundur Halldórsson (Nökkvi Sverrisson var í raun og veru efstur en aðeins eru veitt ein aukaverðlaun fyrir hvern)
• 12 ára og yngri: Ingólfur Daði Guðvarðarson, Daði Arnarsson og Erna Kristín Elíasdóttir
• Kvennaverðlaun: Erna Kristín Elíasdóttir
• Bolvíkingur: Guðmundur Daðason

 

 

 

 

 

 

 

Fleiri myndir frá mótinu eru í myndasafninu.  Öll úrslit má finna á Chess-Results.  

Lokastaðan:

 

Rank		Name	Rtg	Club	Pts
1	IM	Jón Viktor Gunnarsson	2437	TB	13
2	IM	Arnar Gunnarsson	2442	TR	13
3	GM	Henrik Danielsen	2526	Haukar	12
4	FM	Bjorn Thorfinnsson	2422	Hellir	12
5	GM	Jon L Arnason	2507	TB	11½
6	IM	Bragi Thorfinnsson	2387	TB	9½
7		Omar Salama	2212	Hellir	9
8	FM	Sigurbjorn Bjornsson	2316	Hellir	9
9		Stefan Freyr Gudmundsson	2092	Haukar	8½
10	FM	Gudmundur Kjartansson	2328	TR	8½
11		Jorge Rodriguez Fonseca	2042	Haukar	8½
12		Gudmundur Dadason	1975	TB	8½
13		Gudmundur Gislason	2328	TB	8
14	FM	Andri A Gretarsson	2315	Hellir	8
15		Magnus Sigurjonsson	1860	TB	8
16		Gudmundur Halldorsson	2251	TB	8
17		Einar Kristinn Einarsson	2070	TV	8
18		Kristjan Orn Eliasson	1966	TR	8
19		Stefan Arnalds	1935	TB	8
20		Magnus P Ornolfsson	2212	TB	7½
21		Dadi Gudmundsson	1970	TB	7½
22		Unnsteinn Sigurjonsson	1950	TB	7½
23	FM	Halldor Einarsson	2264	TB	7½
24		Saebjorn Gudfinnsson	1910	TB	7½
25		Arnaldur Loftsson	2105	Hellir	7½
26		Sigurdur Olafsson	1970	TB	7½
27		Nokkvi Sverrisson	1560	TV	7½
28		Arni A Arnason	2139	TR	7
29		Sverrir Unnarsson	1875	TV	7
30		Svanberg Mar Palsson	1751	TG	7
31		Pall Sigurdsson	1867	TG	7
32		Ingi Tandri Traustason	1774	Haukar	7
33		Einar Garðar Hjaltason	1655	Goðinn	7
34		Olafur Sigurbj Asgrimsson	1670	TR	7
35		Sigurdur Hafberg	0	Flateyri	7
36		Ingolfur Hallgrimsson	0	Bolungarvík	7
37		Ragnar Saebjornsson	0	Bolungarvík	6½
38		Gisli Hrafnkelsson	1575	Haukar	6½
39		Þorgeir Guðmundsson	0	Bolungarvík	6½
40		Jakub Szudrawski	0	Bolungarvík	5½
41		Páll Sólmundur Halldórsson	0	Bolungarvík	4
42		Ingólfur Daði Guðvarðarson	0	Bolungarvík	4
43		Baldur Smári Einarsson	0	Bolungarvík	4
44		Daði Arnarsson	0	Bolungarvík	3
45		Elías Jónatansson	0	Bolungarvík	3
46		Erna Kristín Elíasdóttir	0	Bolungarvík	0

Fjórir sterkir skákmenn ganga til liðs við Taflfélag Bolungarvíkur

Fjórir sterkir skákmenn hafa ákveðið að ganga til liðs við Taflfélag Bolungarvíkur og styrkja 1.deildarlið þess fyrir deildarkeppnina næstkomandi vetur. Þetta eru Jón Loftur Árnason stórmeistari og alþjóðlegu meistararnir Jón Viktor Gunnarsson, Bragi Þorfinnsson og Dagur Arngrímsson.

Jón L þarf vart að kynna enda hefur hann verið í forystusveit íslenskra skákmanna um áraraðir þó hann hafi minnkað taflmennskuna hin síðari ár. Eftirminnilegasta afrek Jóns L er án efa sigur hans á heimsmeistaramóti sveina 16 ára og yngri árið 1977 þar sem hann varð á undan ekki ómerkari manni en síðar heimsmeistara Garry Kasparov. Jón L var áður í Taflfélaginu Helli.
Alþjóðlegu meistararnir Jón Viktor og Bragi Þorfinnsson eru af þeirri kynslóð sem hefur hin síðari ár verið að taka við keflinu af fjórmenningaklíkunni svokallaðri. Skákmenn af þessari kynslóð stimpluðu sig rækilega inn árið 1995 þegar þeir urðu Ólympíumeistarar sveita yngri en 16 ára. Jón Viktor og Bragi tefldu þar á 1. og 2. borði. Jón Viktor var áður í Taflfélagi Reykjavíkur og Bragi í Taflfélaginu Helli.

Dagur Arngrímsson er einn efnilegasti skákmaður landsins og hefur verið að auka styrkleika sinn jafnt og þétt undanfarin ár. Hann kláraði síðasta skilyrðið fyrir alþjóðlegum meistaratitli í vetur og mun án efa banka á dyr íslenska landsliðsins innan skamms. Dagur var áður í Taflfélagi Reykjavíkur.

Á sama tíma gerir Taflfélag Bolungarvíkur tímamótasamninga við þrjá af þessum öflugu skákmönnum. Jón Viktor og Bragi Þorfinnsson eru styrktir til tveggja ára þannig að þeir geti einbeitt sér algjörlega að taflmennsku og stefnan er að þeir verði báðir orðnir stórmeistarar að þeim tíma liðnum. Dagur Arngrímsson er styrktur til þriggja ára til að auka styrkleika sinn sem skákmanns.

Taflfélag Bolungarvíkur hefur mikla trú á þessum skákmönnum og vill með þessum samningum leggja sitt lóð á vogarskálarnar til þess að efla íslenskt skáklíf.

Á síðasta keppnistímabili vann Taflfélag Bolungarvíkur tvo titla af fjórum mögulegum, sigur vannst í 2. og 4. deild. Á næsta tímabili verður TB með lið í 1.deild og 3.deild og stefnan er sett á að senda tvö lið í fjórðu deild. Öflugt barna- og unglingastarf er hafið í Bolungarvík og standa vonir til að bolvískir unglingar muni tefla í 4.deild ásamt gamalreyndum bolvískum skákmönnum.

 

Myndaalbúm frá undirskriftinni: http://taflfelagbolungarvikur.blog.is/album/fjorir_fraknir/image/505904/

 

Nánari upplýsingar um hina nýju félagsmenn Taflfélags Bolungarvíkur:

 

Jón Loftur Árnason stórmeistari fæddur 13.nóvember 1960.

• Núverandi skákstig: 2507
• Heimsmeistari sveina (16 ára og yngri) árið 1977 í Cagnes-sur-Mer í Frakklandi á undan ekki ómerkari manni en Garry Kasparov.
• Útnefndur stórmeistari árið 1986 Íslandsmeistari 1977, 1982 og 1988.
• Var í sveit Íslands sem varð í 5.sæti á Ólympíumótinu í Dubai 1986 og 6.sæti í Manila 1992

Jón Viktor Gunnarsson alþjóðlegur meistari fæddur 18.júlí 1980.

• Núverandi skákstig: 2431
• Útnefndur alþjóðlegur meistari árið 1998 . Er með einn áfanga að stórmeistaratitli.
• Íslandsmeistari árið 2000.
• Tefldi á 1.borði í sveit Íslands 16 ára og yngri sem varð Ólympíumeistari árið 1995.

Bragi Þorfinnsson alþjóðlegur meistari er fæddur 10.apríl 1981.

• Núverandi skákstig: 2408.
• Útnefndur alþjóðlegur meistari árið 2003 .
• Tefldi á 2.borði í sveit Íslands 16 ára og yngri sem varð Ólympíumeistari árið 1995.

Dagur Arngrímsson alþjóðlegur meistari fæddur 14. janúar 1987.

• Núverandi skákstig: 2392
• Verður útnefndur alþjóðlegur meistari árið 2008.