Taflfélag Bolungarvíkur fer á EM félagsliða í Slóveníu

 

 

Taflfélag Bolungarvíkur fer á EM félagsliða sem haldið er í heilsubænum Rogaška Slatina í Slóveníu dagana 24.september til 2.október n.k.. TB hefur tvisvar áður keppt á EM. Árið 2008 lentum við í 36.sæti og árið 2009 í því 25.  Stefán Kristjánsson, Bragi Þorfinnsson, Jón Viktor Gunnarsson, Þröstur Þórhallsson, Dagur Arngrímsson og Guðmundur Gíslason hafa allir gefið jákvætt svar um þátttöku. Taflfélagið Hellir mun einnig taka þátt. Síðast var TB efsta norrænna taflfélaga, munum við leika það aftur eftir ?

Heimasíða mótsins: http://ecc2011.sahohlacnik.com/

Keppnistímabilið 2010-2011 - pistill

Liðakeppnir:

Íslandsmeistarar í 1.deild 2010-2011
Íslandsmeistarar í 2.deild 2010-2011

Einstaklingsárangur:

Besti "performance" í ÍS 2010-2011:

1. Jón L Árnason 2678
2. Stefán Kristjánsson 2665
3. Jóhann Hjartarson 2578

Besta hlutfall í ÍS 2010-2011:
1. Guðmundur Gíslason 7 vinninga af 7
2. Dagur Arngrímsson 6.5 vinninga af 7
3. Stefán Kristjánsson 5.5 vinninga af 6
4. Jón L Árnason  4.5 vinninga af 5
5. Þröstur Þórhallsson 6 vinninga af 7

ÍS skákfélaga c lið - bestur árangur :
1. Guðmundur Daðason  4 vinninga af 6
2. Jónas H Jónsson  3,5 vinningar af 4
3. Gísli Gunnlaugsson 3,5 vinningar af 7
4. Halldór Gíslason 3 vinningar af 3
5. Unnsteinn Sigurjónsson 3 vinningar af 3
5. Stefán Arnalds 3 vinningar af 4
5. Benedikt Einarsson 2 vinningar af 2

Mestu FIDE-stigahækkanir 1.mai 2010 - 1.mai 2011:
1. Halldór Grétar Einarsson   16 stig   (2220 -> 2236)
2. Þröstur Þórhallsson 11 stig  (2381 -> 2392)
3. Jón L Árnason  9 stig   (2490 -> 2499)
4. Stefán Kristjánsson 8 stig  (2477 -> 2485)
5. Gísli Gunnlaugsson 7 stig  (1839 -> 1846)
6. Bragi Þorfinnsson 5 stig   (2422 -> 2427)

Hraðskákkeppni taflfélaganna:
1. Bragi Þorfinnsson 85%  (25.5 af 30)
2. Þröstur Þórhallsson 84% (21 af 25)
3. Jóhann Hjartarson 75% (9 af 12)
4. Magnús Pálmi Örnólfsson 69.2% (18 af 26)

Ólympíuskákmótið í Khanty-Mansiysk í Síberíu 2010:

Bragi Þorfinnsson var fulltrúi okkar í liðinu og það er mál manna að 
hann ásamt Birni bróðir sínum hafi verið hryggjarstykkið í góðum árangri Íslands.
Bragi fékk 5,5 vinninga af 9. Hann tefldi með "performance" 2417 og hækkaði um 11.9 stig fyrir frammistöðuna.

Reykjavíkurskákmótið 2011

Guðmundur Gíslason náði bestum árangri undir 2400 stigum og náði sínum  þriðja AM áfanga.
Bragi Þorfinnsson og Guðmundur Gíslason urðu í 4.-7. sæti á Norðurlandamótinu í skák með 6 vinninga af 9 mögulegum.

London Chess Classic 2010:

Þröstur Þórhallsson gerði góða ferð til London um miðjan desember og krækti sér í 3.-7. sætið í FIDE Open flokknum í London Chess Classic hátíðinni.

Þröstur fékk 7 vinninga af 9 og tefldi með "performance" 2538 og hækkaði um 20 stig.

Skákþing Íslands 2011 - Landsliðsflokkur:
Bragi Þorfinnsson lenti í öðru sæti hársbreidd frá GM áfanga með 6,5 vinninga af 9 og 15,8 stig í plús (performance 2547)
Þröstur Þórhallsson og Stefán Kristjánsson urðu í 4.-5. sæti með 5,5 vinninga af 9

Bolungarvíkurmeistari:

Daði Guðmundsson er ennþá Bolungarvíkurmeistari !

Hraðskákmót Íslands 2010 - 17.desember 2010:

Jón Viktor Gunnarsson varð Hraðskákmeistari Íslands 2010 með 9  vinninga af 11
Jafn honum, en lægri að stigum, varð Þröstur Þórhallsson.
Okkar menn röðuðu sér í öll efstu sætin, því í 3.-4. sæti með 8 vinninga urðu Jóhann Hjartarson og Jón L Árnason með 8 vinninga.

Afmælismót Jóns L Árnasonar í Hótel Glym Hvalfirði 12.desember 2010:
1. Jóhann Hjartarson 8 vinninga af 9
2. Jón L Árnason 7,5
3.-5. Bragi Þorfinnsson 6,5
3.-5. Helgi Ólafsson 6,5
3.-5. Hjörvar Steinn Grétarsson 6,5

Skák ársins 2010:
2.-3. sæti með 11 atkvæði
Hvítt: IM  Ekstroem Roland  2489
Svart: IM  Bragi Þorfinnsson 2415
Ólympíumótið í  Khanty-Mansiysk
September 2010

Hvítt: GM Sarunas Sulskin 2544
Svart: GM Jóhann Hjartarson 2582
ÍS 2010-2011
Október 2010

4.sæti með 10 atkvæði
Hvítt: GM Þröstur Þórhallsson 2367
Svart: GM Abhijeet Gupta 2600
London Chess Classic - FIDE Open
Desember 2010

Sjá skákirnar á: http://hornid.com/cgi-bin/mwf/topic_show.pl?pid=68832;hl=

Ýmsir sigrar félagsmanna:

20.júní 2010: Jóhann Hjartarson sigraði á Skákhátíðinni í Árneshreppi á Ströndum með 8 vinninga af 9
19.ágúst 2010: Guðmundur Gíslason sigraði á Borgarskákmótinu með 7 vinninga af 7
4.september 2010: Sæbjörn Guðfinnsson vinnur Ljósanæturskákmótið með 7  vinninga af 7
14.október 2011: Magnús K Sigurjónsson vinnur Fimmtudagsmót TR með 6,5 vinninga af 7
24.janúar 2011: Sæbjörn Guðfinnsson vinnur Hraðmót Hellis með 5,5  vinninga af 6
17.mars 2011: Magnús K Sigurjónsson vinnur Fimmtudagsmót TR
24.mars 2011: Magnús K Sigurjónsson vinnur Fimmtudagsmót TR með 6 vinninga af 7
26.apríl 2011: Sæbjörn Guðfinnssom vinnur Ása-mót með 8,5 vinninga af 9
26.mai 2011: Magnús K Sigurjónsson vinnur Fimmtudagsmót TR með 5,5 vinninga af 7

Hraðskákstigalisti í lok tímabils:
1. Jóhann Hjartarson 2630 (tvö GM-norm)
2. Jón L Árnason 2500 (eitt AM-norm)
3. Jón Viktor Gunnarsson 2475  (eitt GM-norm)
4. Bragi Þorfinnsson  2435  (tvö AM-norm)
5. AM Halldór Grétar Einarsson 2315 (eitt GM norm)
6. FM Guðmundur Halldórsson 2295
7. FM Magnús Pálmi Örnólfsson 2285 (eitt AM-norm)
8. Elvar Guðmundsson 2270 (eitt AM-norm)
9. FM Guðmundur Daðason 2115  (eitt AM-norm)
10. BM Stefán Arnalds 2085
11. Unnsteinn Sigurjónsson 2065 (eitt BM-norm)
12. BM Daði Guðmundsson 2055
13. Árni Ármann Árnason 2035
14. Sæbjörn Guðfinnsson 2025  (tvö BM-norm)
15. Gísli Gunnlaugsson 1820
16. Benedikt Einarsson 1700
17. Guðjón Gíslason 1635

Starfsemi félagsins:
Þrjú lið send til keppni í Íslandsmóti Skákfélaga
Þrjár hraðskákæfingar haldnar
Sameiginlegar hraðskákæfingar með Mátum

Íslandsmeistarar þriðja árið í röð

Taflfélag Bolungarvíkur er Íslandsmeistari skákfélaga þriðja árið í röð og þetta árið unnum við tvöfalt, bæði 1. og 2. deild. Það er því óhætt að segja að allt hafi gengið upp í seinni hluta Íslandsmótsins sem fram fór 4. og 5. mars.

 

En byrjum þessa yfirferð í 3. deildinni. C liðið okkar var um miðja deild eftir fyrri hlutann og átti hvorki raunhæfa möguleika á að fara upp né að falla, nema allt myndi gjörsamlega ganga á afturfótunum. Kristján Heiðar Pálsson skipti yfir til okkar í vetur og tefldi sína fyrstu skák með okkur. Við bjóðum hann hjartanlega velkominn heim! Annars voru talsverð forföll hjá okkur, Daði Guðmunds og bræðurnir Unnsteinn og Magnús voru allir fyrir vesta, Stefán þurfti að sinna knattspyrnuþjálfun þar sem Gaui Þórðar var erlendis og ég sjálfur tefldi bara eina skák svo ég gæti sinnt liðsstjórastarfinu betur. Við ákváðum því að keyra liðið talsvert á skákmönnum sem nýlega hafa gengið til liðs við félagið. Með því móti höfum við vonandi náð að virkja enn fleiri skákmenn til að tefla reglulega með okkur næstu árin. Sem dæmi má nefna að Egill Steinar Ágústsson tefldi allar þrjár skákirnar og fékk því mjög góða reynslu sem vonandi nýtist honum vel. Liðið var annars svona skipað: Magnús P Örnólfsson, Guðmundur Daðason, Sæbjörn Guðfinnsson, Gísli Gunnlaugsson, Þormar Jónsson, Jónas H Jónsson, Halldór Gíslason, Kristján H Pálsson og Egill Steinar Ágústsson.

 

Í 5. umferð fengum við KR b og töpuðum naumlega 3,5-2,5. Okkur fannst þetta ekki alveg detta með okkur því Gísli Gunnlaugs var með vinningsmöguleika en varð að sættast á jafntefli og Egill Steinar tapaði eftir að hafa verið með jafna stöðu nánast alla skákina. Hálfur vinningur í viðbót hefði tryggt eitt stig en í staðinn fengum við ekkert. Veröldin getur verið grimm! TG b var næsti andstæðingur og var vitað að það yrði strembið þar sem þeir voru stigahærri á flestum borðum og líklega ekki með síðra lið en KR b (skv. stigalistanum!).  Við sáum einfaldlega aldrei til sólar og 4,5-1,5 tap staðreynd. Í síðustu umferð fengum við Hauka c og vorum komnir í þá stöðu að verða að vinna til að forðast fall. Getumunurinn á liðinum var hins vegar mjög mikill og við unnum fljótt og örugglega 6-0. Sveitin endaði í 9. sæti með 6 stig og 22 vinninga.

 

Þá að 2. deildinni. B liðið var í öðru sæti eftir fyrri hlutann, skammt á eftir Mátum en á hæla okkur komu b lið Hellis og TR. Sveitin okkar var enn sterkari en í fyrri hlutanum og við settum okkur því tvenn markmið, að komast í upp í 1. deild og að vinna 2. deildina. Hópurinn sem tefldi var þessi: Jón Viktor Gunnarsson, Þröstur Þórhallsson, Guðmundur Gíslason, Dagur Arngrímsson, Sophie Milliet, Halldór G Einarsson, Magnús P Örnólfsson og Árni Ármann Árnason.

 

Í fyrstu tveim viðureignum helgarinnar mættum við TR b og Akurnesingum. Skipun liðsstjóra var skýr, bannað að semja jafntefli heldur tefla til sigurs á öllum borðum. Ekki er hægt að kvarta undan árangrinum því báðar viðureignir unnust sannfærandi 5-1. Með þessum glæstum sigrum höfðum við þegar náð meginmarkmiðinu, að tryggja okkur sæti í 1. deild að ári. Fyrir síðustu umferð höfðum við 1,5 vinnings forskot á Máta og þeim vantaði aðeins 1 vinning til að tryggja sé annað sætið. Við máttum því tapa með minnsta mun en samt vinna 2. deildina. Auk þess var spennan í 1. deildinni í hámarki og hugur manna reikaði óneitanlega þangað. Liðsskipunin breyttist þess vegna úr því að tefla stíft til sigurs í að heimilt væri að semja um jafntefli ef menn mætu sínar stöður þannig. Viðureignin þróaðist svo þannig að tiltölulega stutt jafntefli voru samin á 3 borðum, allar stöður nokkuð jafnar eftir um 20 leiki. Við unnum síðan tvær skákir og viðureignina 4-2. Frábær sveit vann því 2. deildina nokkuð örugglega þegar uppi var staðið.

 

Þá er komið að háspennunni í 1. deildinni. Ég hef tekið þátt í Íslandsmóti skákfélaga í 25 ár en man varla eftir annarri eins spennu. Eftir fyrri hlutann var ljóst að 3 félög börðust um titilinn. Vestmannaeyingar leiddu með 1,5 vinnings forskot á okkur og svo var Hellir 1,5 vinningi á eftir okkur. TV átti hins vegar erfiðustu dagskrána eftir en Hellir þá léttustu, a.m.k. ef miðað er við ELO stig. Fyrst mættum við Haukum, svo TR og að endingu TV. Hellir og TV áttust svo við í 5. umferðinni. Við vissum að minnstu mistök myndu kosta titilinn og því settum við upp einfalt plan. Vinna bæði Hauka og TR eins stórt og hægt væri, helst 8-0. Þegar kæmi að viðureigninni við TV myndum við vita hvað þyrfti að gera til að verja Íslandsmeistaratitilinn. Hópurinn sem tefldi seinni hlutann var þessi: Luke McShane, Vladimir Baklan, Yuriy Kuzubov, Yannick Pelletier, Jóhann Hjartarson, Jón L Árnason, Stefán Kristjánsson, Bragi Þorfinnsson, Jón Viktor Gunnarsson og Þröstur Þórhallsson.

 

Í stuttu máli gekk áætlunin fullkomlega upp. Við unnum Hauka 7,5-0,5 og TR 8-0. TV og Hellir tóku svo vinninga hvort af öðru auk þess sem Hellir tapaði dýrmætum vinningum á móti KR. Fyrir síðustu umferð hafði Hellir því helst úr lestinni og við með þriggja vinninga forskot á TV. Vestmannaeyingar þurftu að vinna 5,5-,2,5 til að vinna mótið á stigum. Líkt og í 2. deildinni breyttum við aðeins um takt. Í stað þess að tefla stíft til sigurs í hverri skák var heimilt að gera jafntefli með svörtu ef menn mætu stöðuna svo.  Það er hins vegar erfitt að tefla upp á jafntefli í 8 skákum og við lögðum því upp með að vinna viðureignina en ekki fá bara þá 3 vinninga sem við þurftum. Sú áætlun gekk þó engan veginn upp. Að vísu bauð Helgi Ólafs Jóhanni jafntefli fljótt sem Jóhann þáði, enda með svart. Okkur vantaði þá aðeins 2,5 vinning úr 7 skákum og líkurnar á að það myndi klikka voru litlar. Eða þær áttu a.m.k. að vera litlar. Vestmannaeyingar börðust á hæl og hnakka og eiga mikið hrós skilið fyrir frábæran keppnisanda. TV náði undirtökunum á flestum borðum og á tímabili leit út fyrir að þeim væri að takast hið ómögulega. Við stóðumst þó áhlaupið, Stefán vann sína skák glæsilega og  eftir ýmsar sviptingar endaði viðureignin 3,5-4,5 fyrir TV. Bolvísku Íslandsmeistararnir enduðu með 2 vinninga forskot á silfurhafana úr eyjum.

 

Það er athyglisvert að við töpuðum tveim viðureignum, á móti Helli og TV, en unnum samt mótið. Skýringin á því er að mínu mati klárlega mikil breidd í liðinu og áherslan á að vinna stigalægri liðin stórt. Að vinna TR á öllum borðum hafði þar mest að segja og var það í raun afrek að ná slíkum úrslitum á móti jafn öflugu liði. Allir liðsmenn okkar skiluðu sínu en þó langar mig að nefna fjóra þeirra sérstaklega. Stefán Kristjánsson var með 5,5 vinning úr 6 skákum. Fróðari menn en ég segja að hann hafi nú náð 12,5 vinningum úr 13 skákum fyrir félagið. Ekkert slor það! Jón L og Þröstur náðu báðir 4,5 vinningum af 5 og Gummi Gísla var með 3 af 3 (í fyrri hlutanum).

 

Frábær helgi í alla staði og félagið verður í fyrsta skiptið með tvær sveitir í 1. deild á næsta tímabili. Án efa munu TV og Hellir gera aðra atlögu að titlinum og við getum því hlakkað til mikillar skemmtunar næsta vetur.

 

Að lokum vil ég útnefna Ólaf Jens Daðason sem félagsmann helgarinnar. Jenni tefldi ekkert að þessu sinni en veitti algerlega ómetanlegan stuðning. Nokkrum dögum fyrir helgina bauð hann fram alla þá aðstoð sem á þyrfti að halda. Á föstudagskvöldinu fór hann t.d. tvær ferðir á hótelið með erlendu keppendurna svo þeir kæmust beint í hvíld fyrir erfiðan laugardag. Það gefur manni óneitanlega mikinn kraft að finna fyrir svona góðum stuðningi. Kærar þakkir!

  Guðmundur M Daðason, formaður.

Erlendir liðsmenn okkar í seinni hluta ÍS

  GM Luke McShane Englandi 2664

Einn heitasti skákmaðurinn í heiminum í dag. Stóð sig mjög vel í London Classic mótinu í desember og vann m.a. Magnus Carlsen í flottri skák. Endaði í skiptu öðru sæti ásamt heimsmeistaranum Anand. Luke vann síðan B-flokkinn í Wijk aan Zee  (Tata Steel) ásamt David Navara, í lok janúar.

 

 

 

 

  GM Yuriy Kuzubov Úkraínu 2624

Þetta er í þriðja sinn sem Kuzubov teflir með okkur.  Hann vann Reykjavíkurskákmótið árið 2010 ásamt fleirum.

 

 

 

 

 

 

 

 

  GM Vladimir Baklan Úkraínu 2613

Þetta er í þriðja sinn sem Baklan tefli með okkur.  Hann tefldi á 3ja borði í sigursveit Úkraínu á Ólympíumótinu í Istanbúl árið 2000. Mjög geðugur náungi sem þjálfar núna yngsta stórmeistara heims hann Ilya Nyzhnik.

 

 

 

 

 

 

  GM Yannick  Pelletier    Swiss    2586

Þetta er í fyrsta sinn sem Yannick teflir með okkur. Hann teflir á fyrsta borði fyrir Swiss. 

 

 

 

 

 

 

  IM Sophie Milliet  Frakklandi   2375

 Sophie er unnusta Yannick og mun tefla í annari deildinni með okkur. 

 

 

 

 

 

 

 

 

Þetta voru erlendu keppendurnir okkar, en að sjálfsögðu eru þeir bara skrautfjaðrirnar og saman munum við vinna Íslandsmeistaratitilinn í vor !

Erlendir keppendur annarra liða sem við vitum um og hafa fengið boð í Reykjavíkurskákmótið eru:

Taflfélagið Hellir:

GM    Miroshnichenko Evgenij    UKR    2670  
GM    Adly Ahmed    EGY    2640       
GM    Gupta Abhijeet    IND    2590        

Taflfélag Vestmannaeyja:

GM    Gustafsson Jan    GER    2652
GM    Hammer Jon Ludvig    NOR    2647
GM    Miton Kamil    POL    2616

Önnur félög:

GM    Hess Robert L    USA    2572        KR
IM    Henrichs Thomas    GER    2479        Fjölni
GM    Ivanov Mikhail M    RUS    2431    Taflfélag Reykjavíkur

Varðandi borðaröð félaganna að öðru leiti vísast í styrkleikaröðun þeirra sem sjá má á: https://spreadsheets.google.com/ccc?key=0AkWXnEohR48TdERxejlLeU5iWk1lcnl5a25yRXFnY1E&hl=en&authkey=CPTwuKQK#gid=0

 

 

 

Opna Gíbraltarmótið

 

 

Opna Gíbraltarmótið fer fram dagana 24.janúar til 3.febrúar næstkomandi.  Þetta er eitt flottasta opna skákmót ársins með góðum aðstæðum og háum verðlaunum. Félagar okkar þeir Þröstur Þórhallsson og Stefán Kristjánsson hyggjast taka þátt í mótinu og tilvalið fyrir menn, sem hafa tækifæri á, að skella sér með þeim. Eins og fyrr segir þá eru aðstæður mjög góðar í mótinu og reikna má með að hitastig á þessum tíma á Gíbraltar sé 15-17 gráður. Golfvellir í nágrenninu og tilvalið að sameina smá vetrarfrí og skák. Mörg þekkt nöfn eru á þátttakendalistanum m.a. Vassily Ivanchuk og hin nýkrýndi heimsmeistari kvenna Hou Yifan.  Mótið er opið öllum og verðlaun í hinum ýmsu stigaþrepum.

Sjá nánar á heimasíðu mótsins: http://www.gibraltarchesscongress.com/gib2011/index.html

Einnig getur Þröstur gefið ykkur góð ráð: [e-mail]

Nýr stórmeistari hjá Taflfélagi Bolungarvíkur

 

 

 Í dag varð Illya Nyzhnyk stórmeistari í skák eftir að hann gerði jafntefli við indverska stórmeistarann Abhijeet Gupta á alþjóðlega mótinu í Groningen í Hollandi. Nyznyk er því yngsti stórmeistari heims í dag. Nyznyk gekk í raðir okkar í sumar og óskar Taflfélag Bolungarvíkur honum til hamingju með árangurinn !

 

 

Um miðjan desember náði annar félagsmaður okkar frábærum árangri. En þá varð Englendingurinn Luke McShane í 2.-3. sæti ásamt indverska heimsmeistaranum Viswanathan Anand í London Chess Classic mótinu. Magnúsi Carlsen stigahæsti skákmaður heims vann móti, en okkar maður vann Carlsen í flottir skák í fyrstu umferð. Ummæli Helga Ólafssonar um þá skák: "Það voru sönn snilldartilþrif sem sáust til Íslandsvinarins Luke McShane í sigurskákinni við Magnús Carlsen. Er ég ekki frá því hér sé á ferðinni ein besta skák ársins."

Sjá skákina á: http://skak.blog.is/blog/skak/entry/1127074/

Þröstur Þórhalls og Jón Viktor í ham

 

 

 Þröstur Þórhallsson gerði góða ferð til London um miðjan desember og krækti sér í 3.-7. sætið í FIDE Open flokknum í London Chess Classic hátíðinni. Þetta er besti árangur Þrastar í langan tíma og kærkominn eftir langan öldudal. Þröstur vann m.a. indverska stórmeistarann Abhijeep Gupta glæsilega í lokaumferðinni.

Jón Viktor og Þröstur urðu síðan jafnir og efstir á Friðriks-mótinu, sem jafnframt var Hraðskákmót Íslands, rétt fyrir jólin. Jón Viktor var hærri að Monrda stigum og varð því Hraðskákmeistari Íslands 2010. Reyndar urðu félagsmenn TB í fjórum efstu sætunum.

1. Jón Viktor Gunnarsson  TB 9

2. Þröstur Þórhallsson TB 9

3. Jóhann Hjartarsson TB 8

4. Jón L Árnason TB 8

5. Helgi Ólafsson TV 8

6. Omar Salama Helli 8

7. Bergsteinn Einarsson TR 8

Íslandsmót skákfélaga

Fyrri hluti Íslandsmóts skákfélaga fór fram 8.-10. október. Keppnin fór fram í Rimaskóla með hefðbundnu sniði og má gera ráð fyrir að um 400 skákmenn hafi mætt til leiks. Við Íslandsmeistararnir í Bolungarvík ætlum okkur að sjálfsögðu að verja titilinn og verða Íslandsmeistarar þriðja árið í röð. Keppnin í ár mun þó verða harðari en nokkru sinni fyrr eins og kom berlega í ljós í fyrri hlutanum. B lið félagsins teflir í annarri deild og fyrirfram bjuggumst við við að vera í baráttu við Máta, Helli b og TR b um að fara upp í 1. deild. Í þriðju deild er C liðið okkar og þar sem þónokkuð var um forföll áttum við alveg eins von á að geta lent í fallbaráttu. Undanfarin ár höfum við einnig haft D lið í fjórðu deildinni en vegna forfallanna neyddumst við til að draga liðið úr keppni þennan vetur. Ljóst er að við þurfum að fjölga félögum til að geta sent það aftur til leiks á næstu árum.

Helsti styrktaraðili Íslandsmeistaranna þessa helgi var Nói Siríus. Fyrir hverja umferð var súkkulaðiplötum dreift við borð allra liðsmanna okkar og vakti það óskipta athygli og jafnvel öfund á köflum. Kunnum við Nóa Siríus bestu þakkir fyrir stuðninginn. En þá að taflmennskunni.

 

Fyrsta umferð

A liðið byrjaði á að mæta sterku liði Fjölnis sem hafði fjóra erlenda skákmenn auk Héðins Steingrímssonar. Við vorum með tvo Úkraínumenn þessa helgi á efstu borðunum, Kryvoruchko og Kuzubov. Aðrir í sveitinni á móti Fjölni voru Jóhann Hjartarson, Stefán Kristjánsson, Bragi Þorfinssson, Jón Viktor Gunnarsson, Þröstur Þórhallsson og Guðmundur Gíslason. Okkar menn fóru vel af stað og unnu sannfærandi 6,5-1,5. Af öðrum ólöstuðum tefldi Jóhann alveg magnaða skák. Segja má að hann hafi byrjað á að koma andstæðingnum í hálfgerða leikþröng. Síðan lét hann andstæðinginn veikja peðastöðuna með flottum drottningar og biskups leikjum (Dh1 og Bg2). Eftir það sótti kóngurinn fram og hirti peðin eitt af öðru. Hrein unun að sjá hvernig Jóhann bætti stöðuna sína skref fyrir skref og ungir skákmenn ættu sérstaklega að skoða þessa skák og læra af. Jóhann sýndi þarna af hverju hann er sterkasti skákmaður sem Ísland hefur átt!

B liðið mætti Haukum b og vorum við stigahærri á öllum borðum. Sveitina okkur skipuðu Dagur Arngrímsson, Halldór Grétar Einarsson, Magnús Pálmi Örnólfsson, Stefán Arnalds, Guðmundur Daðason og Sæbjörn Guðfinnsson. Segja má að við höfum teflt óaðfinnanlega enda unnum við 6-0 og vorum aldrei í taphættu á neinu borði.

C liðið átti á brattann að sækja í fyrstu umferð á móti stigahærra liðið TR c. Magnús Sigurjónsson var á fyrsta borði og með honum tefldu Gísli Gunnlaugsson, Sigurður Hafberg, Jónas H Jónsson, Jón Eðvald Guðfinnsson og Páll Sólmundur Eydal. Við byrjuðum reyndar vel og Jónas vann snaggarlegan sigur en svo hallaði verulega undir fæti. Niðurstaðan varð 4,5-1,5 tap.

 

Önnur umferð

Jóhann og Stefán hvíldu hjá A liðinu en Jón L Árnason og Dagur komu í liðið í staðinn. Við mættum KR ingum og unnum ótrúlegan 8-0 sigur. Dramatíkin var þó mikil því síðasta skák viðureignarinnar var á öðru borði, Kuzubov á móti Sören Bech Hansen. Okkar maður var búinn að veramjög tímanaumur í talsvert marga leiki og staðan hans var viðkvæm. Smám saman saxaðist líka í tíma Hansen en staða hans fór batnandi og var nánast orðin unnin. Á einu augabragði snérist hins vegar taflið þegar Hansen skákaði með hrók, saklaus leikur að því er virtist, og skyndilega hrundi staða hans til grunna. Svipbrögð Hansen og viðbrögð þegar hann uppgötvaði smám saman hvað hafði gerst, hvað hann hafði gert, eru ólýsanleg. Það hefði þurft að vera myndavél á staðnum. Fyrst rak hann upp stór augu, svo var hausinn hristur, aðeins bölvað, slegið á enni sér, bölvað meira, hárið reytt. Að lokum gefið. Sorgleg fyrir Hansen og KR og alls ekki sanngjarnt en að því er ekki spurt.

Í annarri deild tefldum við á móti Reykjanesbæ. Árni Ármann Árnason og Unnsteinn Sigurjónsson komu inn í liðið í stað Dags og Sæbjörns, sem færðust í A og C liðið. Andstæðingur minn mætti ekki og því fengum við strax einn vinning gefins. Í öðrum viðureignum tefldum við vel og unnum samtals 4-2. Sigurinn hefði þó getað orðið stærri því Árni tefldi svo djarft til vinnings að hann endaði á að tapa og Stefán hefði hugsanlega getað fengið meira en jafntefli úr sinni skák.

Í þriðju deild mættum við C liði Akureyrar og markmiðið var sett á sigur. Sæbjörn, Þormar Jónsson og Benedikt Einarsson komu inn í liðið í stað Jónasar, Jóns Eðvalds og Páls Sólmundar. Fyrirkomulagið í 3. og 4. deild er þannig að vinningar skipta ekki meginmáli heldur fást 2 stig fyrir að vinna viðureign og 1 fyrir 3-3 jafntefli. Annars ekkert stig! Það má því lítið útaf bregða. Það stefndi í 3-3 eða jafnvel tap þegar heilladísirnar snérust með okkur. Sigurður Hafberg náði með mikilli seiglu að bjarga sinni skák í jafntefli og sama má segja um Þormar. Á 6. borði var Halldór Blöndal með gjörunna stöðu á móti Benedikt, manni yfir og með mátsókn. Auk þess átti Halldór um klukkutíma eftir en Benedikt nokkrar mínútur. Þegar Benedikt var að því kominn að gefa skákina lék Halldór af sér drottningunni. Við það fipaðist Halldór algerlega og í staðinn fyrir að beina skákinni út í mun verra endatafl, sem þó hefði mátt berjast áfram í, hélt hann áfram að leika af sér og gaf stuttu síðar. Heiðursmaðurinn Benedikt baðst afsökunar á þessum sigri sínum, skiljanlega fyrir okkur sem urðum vitni að þessu. Niðurstaðan var 4,5-1,5 sigur sem var auðvitað allt of stór miðað við útlitið á tímabili.

 

Þriðja umferð

Nú var komið að erfiðustu viðureign Íslandmeistaranna þessa helgi, á móti Helli. Hannes Hlífar tefldi aðeins á 4. borði en fyrir ofan hann voru þrír mjög stigaháir erlendir skákmenn, m.a. David Navara sem hefur 2722 stig. Jóhann og Stefán komu aftur í liðið og má segja að allt hafi verið lagt undir. Baráttan var hörð en þegar líða tók á viðureignina varð útlitið sífellt dekkra. Stöðurnar á borðunum gáfu ekki fyrirheit um góð úrslit. Segja má að skák Hannesar og Jóns L hafi skipt sköpum. Hannes hafði yfirburðastöðu, ef ekki kolunnið, þegar hann lék hræðilegum afleik. Jón nýtti sér mistökin um leið og Hannes gat ekkert gert nema gefið. Niðurstaðan varð 4,5-3,5 tap en við hefðum aðeins fengið 2,5 vinning ef Jón hefði tapað. Við vorum því sáttir þrátt fyrir tap með minnsta mun enda Hellir stigahærra liðið í þessari viðureign og útlitið verulega dökkt um tíma.

B liðið mætti b liði Hellis á sama tíma. Guðmundur Gísla og Dagur færðust niður í B liðið í stað Árna og Unnsteins. Þeir reyndust hinn sæmilegast liðsstyrkur því þeir unnu báðir sínar skákir. Ég tefldi illa og tapaði en Stefán Arnalds og Halldór Grétar gerðu jafntefli. Staðan var því 3-2 þegar aðeins ein skák var eftir, á milli Gunnars Björnssonar forseta SÍ og Magnúsar Pálma stjórnarmanns SÍ. Gunnar sveið Magnús illa í endataflinu og tryggði Helli því jafntefli í viðureigninni. Keppnismaðurinn Magnús var auðvitað ekki sáttur við þessi úrslit og bannaði algerlega að þessi úrslit yrðu rifjuð upp. Af tillitssemi við Magnús verður því ekki minnst á þessa skák hér og af tillitssemi við aðra félagsmenn okkar verða ekki rifjaðar upp fyrri viðureignir okkar við forsetann.

Til að fullkomna daginn þá mættust C lið okkar og Hellis auðvitað í þriðju deildinni. Þetta var því sannkölluð TB – Hellis umferð. Unnsteinn færðist úr B liðinu í C liðið og Halldór Gíslason tefldi líka en Sæbjörn og Benedikt sátu hjá. Viðureignin var ansi jöfn og staðan 2,5-2,5 þegar ein skák var eftir. Þar tefldi Þormar Jónsson við Ólympíufarann Jóhönnu Björg. Þormar stóð til vinnings og allt útlit fyrir 2 stig í hús. Slæmur afleikur breytti hins vegar stöðunni og nú var jafntefli í spilunum. Því miður fyrir Þormar lék hann aftur af sér og skákin tapaðist, tvö stig út um gluggann þar. Jóhanna gerði þó vel í að nýta sér mistök Þormars sem tefldi vel alla helgina þó úrslitin hafi ekki alltaf verið í samræmi við það. Ljóst er þó að Þormar er mjög góð viðbót við liðið og fögnum við komu hans.

 

Fjórða umferð

Á sunnudagsmorgninum mætti A liðið Akureyringum, sem komnir eru aftur í 1. deildina. Þar eiga auðvitað vinir mínir að norðan heima! Jóhann og Bragi hvíldu og komu Guðmundur Gísla og Dagur því inn í liðið á ný. Við vorum með mun stigahærra lið og því var stefnt á stórsigur. Það gekk ekki eftir og unnum við aðeins 5,5-2,5. Við hefðum sætt okkur við einum vinningi meira og voru þetta því klárlega vonbrigði.

B liðið mætti Selfyssingum og var liðsskipan okkar ansi athyglisverð fyrir margra hluta sakir. Albræðurnir Unnsteinn og Magnús Sigurjónssynir voru hlið við hlið á 5. og 6. borði. Hálfbræðurnir Stefán Arnalds og Guðmundur Daðason voru einnig hlið við hlið á 3. og 4. borði. Hlið við hlið á 1. og 2. borði sátu svo Halldór Grétar og Magnús Pálmi, fulltrúar okkar í stjórn SÍ. Allir sex teljumst við vera innfæddir Bolvíkingar og eru líklega nokkur ár síðan að sveit frá okkur hafi verið þannig skipuð. Því miður tókum við ekki mynd af liðinu en við stillum okkur kannski upp síðar! Liðsskipanin hlýtur að hafa sett Selfyssinga út af laginu, eða eflt okkur gríðarlega, því við unnum sannfærandi sigur 5,5-0,5. Frábær endir á góðri helgi B liðsins.

C liðið endaði á að mæta Skákfélaginu Vinjar og voru Jónas, Benedikt og Hálfdán Daðason nú komnir í liðið. Ekki er hægt að kvarta yfir þeirra innkomu því samtals tryggðu þeir liðinu tvo vinninga og lögðu þannig grunn að 3,5-2,5 sigri okkar. Það verður samt eiginlega að geta þess, Vinjarmönnum til varnar, að það vantaði þrjá sterka skákmenn í þeirra lið. Tvö mikilvæg stig í hús og mjög gott að enda helgina á sigri.

 

Staðan

Keppnin um Íslandsmeistaratitilinn hefur aldrei verið jafnari. TV eru efstir með 25 vinninga, við erum í öðru sæti með 23,5 og Hellir þriðju með 22. Vestmannaeyingar eiga hins vegar erfiðustu dagskrána eftir, m.a. bæði okkur og Helli, á meðan Hellir á léttustu dagskrána eftir. Hellir hefur auk þess forskot á okkur þar sem þeir unnu innbyrðis viðureignina. Ég tel reyndar að Hellir sé í lykilstöðu til að vinna mótið. Þeir geta enn bætt við sig einum mjög öflugum erlendum stórmeistara og ættu að hafa alla burði til að vinna tvær viðureignir 8-0 ásamt því að vera sigurstranglegir þegar þeir mæta TV. Vestmannaeyingar eru klárlega að leggja allt undir þetta árið og hljóta að mæta til leiks með enn sterkari erlenda stórmeistara í seinni hlutann. Þeir munu því ekkert gefa eftir. Við ætlum okkur auðvitað að berjast áfram og reyna að verja Íslandsmeistaratitilinn og í mínum huga er ljóst að dagsformið mun á endanum ráða úrslitum. Í skák er stundum sagt að sá sem leikur næst síðast af sér vinnur. Það á vel við þessa baráttu því héðan í frá munu minnstu mistök kosta Íslandsmeistaratitilinn.

B liðið kom á óvart í annarri deild og er í öðru sæti með 18,5 vinninga. Efstir eru Mátar með 20 vinninga en TR b hefur 15 vinninga og Hellir b 14. Liðin eiga miserfiða andstæðinga eftir og því stefnir í mikla baráttu um tvö efstu sætin. Þessi árangur kom okkur á óvart því hvorki Elvar Guðmundsson né Guðmundur Halldórsson gátu teflt þessa helgi, auk þess sem Árni Ármann gat bara teflt eina skák. Liðið gæti því orðið enn sterkara í seinni hlutanum og ef taflmennskan heldur áfram að vera svona góð munum við eiga tvö lið í efstu deild að ári!

Vegna margs konar forfalla áttum við von á að C liðið yrði nálægt botnbaráttu þriðju deildar. Það var því ánægjulegt að ná 4 stigum í hús og siglir liðið nokkuð lygnan sjó sem stendur um miðja deild. Það er óraunhæft að liðið blandi sér í toppslaginn og er markmið áfram að halda okkur eins fjarri botnbaráttunni og mögulegt er. Ánægjulegt var að sjá nokkur ný andlit tefla með liðinu og greinilegt að fengur er að Jónasi, Þormari og Halldóri Gíslasyni sem allir hafa frekar nýlega gengið til liðs við félagið. Húmoristinn Sigurður Hafberg kom frá Flateyri til að tefla og mun vonandi halda því áfram næstu árin.

 

Að lokum

Um leið og ég þakka Braga Kristjánssyni og Ólafi Ásgrímssyni fyrir skákstjórn, Helga Árna og Rimaskóla fyrir umgjörðina og Ásdísi, Skáksambandinu og ýmsum fleirum fyrir alla vinnuna og utanumhaldið, vil ég þakka einum liðsmanni okkar sérstaklega. Gísli Gunnlaugsson hefur í mörg ár hvorki látið veikindi né stórafmæli aftra sér frá því að tefla fyrir okkar hönd. Ef það hefur vantað menn hefur hann ýmist útvegað son sinn eða vini til að bjarga okkur. Ef það þarf að skutlast þá er hann ávallt reiðubúinn, hvort sem er til Akureyrar eða út á Leifsstöð. Gísli er hreint út sagt fyrirmyndar liðsmaður og félagi. Takk fyrir allt Gísli!

 

Guðmundur Daðason, formaður TB

 

Árangur einstakra liðsmanna Íslandsmeistaranna:

Yuriy Kryvoruchko  3 af 4

Yuriy Kuzubov  2,5 af 4

Jóhann Hjartarson  1 af 2

Jón L Árnason  3 af 3

Stefán Kristjánsson  2,5 af 3

Bragi Þorfinnsson  1 af 3

Jón Viktor Gunnarsson  2,5 af 4

Þröstur Þórhallsson  3,5 af 4

Guðmundur Gíslason  4 af 4

Dagur Arngrímsson  3,5 af 4

Halldór Grétar Einarsson  2,5 af 4

Magnús Pálmi Örnólfsson  3 af 4

Árni Ármann Árnason  0 af 1

Stefán Arnalds  3 af 4

Guðmundur Daðason  3 af 4

Unnsteinn Sigurjónsson  3 af 3

Sæbjörn Guðfinnsson  2 af 2

Magnús Sigurjónsson  2 af 4

Gísli Gunnlaugsson  1,5 af 4

Þormar Jónsson  0,5 af 3

Sigurður Hafberg  2 af 4

Jónas H Jónsson  1,5 af 2

Jón Eðvald Guðfinnsson  0 af 1

Benedikt Einarsson  2 af 2

Halldór Gíslason  1 af 1

Hálfdán Daðason  0,5 af 1

Páll Sólmundur Eydal  0 af 1

Þröstur Þórhallsson með bestu skák ársins 2009

Skák Þrastar á móti Frakkanum Fabien Guilleux var kosin besta skák ársins 2009 í kosningu á SkákHorninu.

 

[Event "Reykjavik Open 2009"] [Site "Reykjavik"] [Date "2009.03.31"] [Round "8.16"] [White "Thorhallsson, Throstur"] [Black "Guilleux, Fabien"] [Result "1-0"] [ECO "D01"] [WhiteElo "2442"] [BlackElo "2303"] [Annotator "Einarsson,Halldor Gretar"] [SetUp "1"] [FEN "2k1r2r/p1q2p2/2p3p1/5bQp/3NpR2/2N5/PPP5/1K1R4 b - - 0 27"] [PlyCount "14"] [EventDate "2009.03.24"] 27... f6 {Svartur hefur sennilega haldid ad hann vaeri ad vinna lid. Rybkan helt thad lika i fyrstu. En Throstur a bombu uppi i erminni.} 28. Qxf6 Qxf4 29. Nxc6 {Throstur og riddarar hafa gjarnan spilad vel saman. Vid fyrstu syn er thetta ekkert serstakt, en thegar nanar er skodad kemur i ljos ad menn hvits vinna einstaklega vel saman og svartur er med koltapad. Nokkrir mogulegar varnir:} Rh7 (29... Qc7 30. Nb5 Rd8 31. Rd6 Rxd6 32. Nxd6+ Kd7 33. Ne5) 30. Rd8+ Rxd8 31. Qxd8+ Kb7 32. Na5+ Ka6 33. Qf6+ Kxa5 34. b4+ {Hvitur vinnur drottningu svarts eftir 34. - Kxb4 35. Rd5+. En fegurdin i thessu er ad svartur er mat eftir 35. Dd4+ Ka5 36.Dc5+ Ka6 37.Db5+. Svartur sa thetta og gafst upp. Glaeilegur endir hja Thresti og spurning hvort thetta hafi ekki verid flottustu tilthrif sidasta vetrar hja islenskum skakmanni.} 1-0

Keppnistímabilið 2009-2010 - pistill

Í gær enduðum við Bolvíkingar keppnistímabilið með sigurhátíð. Félagar og makar hittust þá, borðuðu saman og héldu upp á sigra síðastliðins árs.

Liðakeppnir:

Íslandsmeistarar í 1.deild 2009-2010

Hraðskákmeistarar taflfélaga 2009

25.sæti á EM félagsliða, efst liða frá Norðurlöndum

 

Einstaklingsárangur:

Mestu FIDE-stigahækkanir 1.júlí 2009 - 1.mai 2010:

1.Bragi Þorfinnsson   46 stig   (2377 -> 2423)

2. Guðmundur Gíslason  22 stig  (2348 -> 2370)

3. Stefán Kristjánsson  15 stig   (2462 -> 2477)

 

ÍS skákfélaga c og d lið:

1. Sæbjörn Guðfinnsson   4 vinninga af 6

2. Egill Steinar Ágústsson  4 vinningar af 7

3. Daði Guðmundsson   3,5 vinninga af 6

4. Gísli Gunnlaugsson  3,5 vinninga af 7

 

Hraðskákkeppni taflfélaganna

1. Þröstur Þórhallsson  91%   (31 af 34)

2. Jón Viktor Gunnarsson 80%  (33,5 af 42)

3. Bragi Þorfinnsson  74%  (15,5 af 21)

 

EM félagsliða

Guðmundur Gíslason varð með 3ja besta árangur allra keppenda sem tefldu á fjórða borði (5,5 af 7)

 

Skákþing Íslands 2009 - Landsliðsflokkur: 

Bragi Þorfinnsson og Jón Viktor Gunnarsson urðu í 2.-3. sæti með 7,5 vinninga af 11. Þröstur Þórhallsson lenti í 4.sæti með 6,5 vinninga.

Opna Bolungarvíkurmótið 2009:
Daði Guðmundsson varði 29 ára gamlan Bolungarvíkurmeistaratitil sinn. Fékk 8,5 vinninga af 11.

 

Hraðskákmót Íslands 2009:

Jón L Árnason varð í 2. sæti með 10 vinninga af 13

 

Ská ársins 2009:

Skák Þrastar Þórhallssonar  á móti Fabian var valin skák ársins 2009

 

Stórmót CCP og TR:

Jón L Árnason sigraði með 5 vinninga af 7.  Jóhann Hjartarson varð í 2.-3. sæti með 4,5 vinninga.

 

Afrekshópur Skáksambandsins:

Sex félagasmenn Taflfélags Bolungarvíkur voru valdir í Afrekshóp Skáksambandsins: Bragi Þorfinnsson, Dagur Arngrímsson,  Guðmundur Gíslason, Jón Viktor Gunnarson, Stefán Kristjánsson og Þröstur Þórhallsson.

 

Skákþing Íslands 2010 - Landsliðsflokkur:

Stefán Krsitjánsson lenti í 3ja sæti með 7 vinninga af 10. Bragi Þorfinnsson og Guðmundur Gíslason urðu í 4.-5. sæti með 6,5 vinninga.

 

Ýmsir sigrar félagsmanna:

5.nóvember: Magnús K Sigurjónsson vinnur Fimmtudagsmót TR með 6,5 vinninga af 7

23.nóvember:  Sæbjörn Guðfinnsson vinnur Atkvöld Hellis með 6 vinninga af 6

7.des 2009: Sæbjörn Guðfinnsson vinnur Hraðkvöld Hellis með 7 vinninga af 7

18.mars 2010: Magnús Pálmi Örnólfsson sigrar Fimmtudagsmót TR með 5,5 vinninga af 7

8.apríl 2010: Magnús Pálmi Örnólfsson sigrar Fimmtudagsmót TR með 9 vinninga af

 

Hraðskákstigalisti í lok tímabils:

1. Jón Viktor Gunnarsson 2475  (eitt GM-norm)

2. Bragi Þorfinnsson  2435  (tvö AM-norm)

3. FM Guðmundur Halldórsson 2295

4. Elvar Guðmundsson 2270 (eitt AM-norm)

5. FM Halldór Grétar Einarsson 2265 (eitt GM norm)

6. BM Guðmundur Daðason 2240  (einn AM og einn FM áfanga)

7. FM Magnús Pálmi Örnólfsson 2180

8. BM Stefán Arnalds 2145 

9. BM Daði Guðmundsson 2105

10. Sæbjörn Guðfinnsson 2100  (eitt BM-norm)

11. Árni Ármann Árnason 2045

12. Gísli Gunnlaugsson 1820

13. Benedikt Einarsson 1700

14. Guðjón Gíslason 1635

 

Starfsemi félagsins:

Taflfélag Bolungarvíkur gaf út Tímaritið Skák 2009-2010,  fjögur tölublöð.

Landsliðsflokkur haldinn í Bolungarvík í september

Opna Bolungarvíkurmótið í skák haldið í september í Bolungarvík

Hraðskákkeppni Taflfélaganna haldin í Bolungarvík í september

Hraðskákmót Íslands haldið í Bolungarvík í september

Alþjóðamót Taflfélags Bolungarvíkur haldið í september

Fjögur lið send til keppni í Íslandsmóti Skákfélaga

Lið sent á EM félagsliða í október

Þrjár hraðskákæfingar haldnar

Sigurhátíð íslandsmeistaranna í apríl